كل اسباب نقص زيت المحرك

 

لو بتلاحظ وجود نقط او بقعة زيت تحت عربيتك

او بتلاحظ نقص زيت في مقاس الزيت و مفيش نقط او بقع تحت العربية
النهارده هقولك كل الاسباب اللي بتعمل كده بسرعه من غير ما نطول عليكم

 

اول حاجه

 لو حاجه خبطت العربيه من تحت زي حجرة او بلاعة او طلعت علي رصيف او حاجه شبه كده اللي بيحصل في الغالب ان كرتير الزيت اللي هوا الوعاء السفلي اللي بيتجمع فيه الزيت بيتخرم او يتشرخ علي حسب بقي هوا الومنيوم ولا حديد و في كلا الحالتين بتحتاج تفكه و تغسلة غسلة محترمة و توديه يتلحم بقي سواء كان حديد بيلحموه بالنحاس او لو كان الومنيوم فبيتلحم الومنيوم و ابعد تماما عن لحام الايبوكسي اللي هوا المادتين اللي بيتخلطوا علي بعض لانهم بعد وقت قليل اللحام بيفك بسبب درجة حرارة الزيت و المحرك و طبعا في الحالة دي هتلاحظ نقط زيت تحت العربية او بقعه زيت

نيجي بقي للحالات المحيره شوية

تعريق زيت بس علي الموتور من تحت و ممكن تلاقي نقط بسيطه او متلاقيش اصلا نقط تحت الموتور

دا غالبا بيكون بسبب اويسلات الموتور زي اويل سيل الكامه او الكرنك الداخلي اللي ناحيه الفتيس او الخارجي اللي ناحيه سير التقسيمة

في حاله اويل سيل الكرنك الداخلي اللي جانب الفتيس هتلاحظ بداية تسريب الزيت من بين الموتور و الفتيس و في الحاله دي هتحتار ده زيت فتيس ولا زيت موتور ... لو الفتيس اوتوماتيك في الغالب هتلاقي الزيت لونه احمر او وردي يبقي زيت فتيس و ده ممكن يكون بيتسرب من ناحيه الكوبلن الداخلي اما لو االفتيس عادي هتحتاج بقي اسهل حاجه انك تغسل المنطقة بتاعت التسريب او بمعني اصح هتغسل الموتور كله من تحت علشان تشوف بوضوح بداية الزيت جايه منين

اما لو التسريب من ناحيه سير التقسيمة فيكون معاك احتمال من اتنين ... اما اويل سيل الكامه و في الحاله دي هيكون بدايه تسريب الزيت من اعلي الموتور و نازل علي جانب الموتور كله ... او اويل سيل كرنك خارجي و هتلاقي بدايه الزيت من اخر الموتور من تحت

و رقم تلاته بقي تسريب من طبة الزيت

 بسبب تفويت الطبه او عدم ربطها باحكام .. او تسريب من فلتر الزيت و في الحالتين هتلاقي نقطه الزيت بتاعت التسريب باينه بالعين المجرده سواء علي الطبه او علي فلتر الزيت

رقم اربعه بقي او ممكن نقول انه استكمال لرقم 2 

انك تلاحط نقط زيت و العربية سخنة او و العربيه دايرة فقط و بمجرد ما تبرد مفيش أي تسريب

في الحاله دي اقوله ان التسريب غالبا من اويل سيل  الكامه اللي في النص اللي فوق من المحرك عند سير التقسيمه .. و السبب في امتناع تسريب الزيت بمجرد ما العربية تبرد .. ان بيكون مضخه الزيت بطلت تضخ زيت في النصف العلوي من المحرك و بالتالي مفيش ضغط زيت في المحرك من فوق علشان يعمل تسريب

و رقم خمسه بقي تسريب من غطاء التكيهات 

اللي في وش الموتور و هتلاحظ في الحاله دي ان في رشح زيت في داير الموتور من فوق و الحل في الحاله دي انك بتغير جوان غطاء تكاهات بعد تنظيف مكان الجوان القديم

طيب لو لاحظنا نفخ زيت من مقاس الزيت مع العلم ان حاله الموتور جيده ... في الحاله دي هيكون السبب سدد في بلف تبخير الزيت المسؤول عن تفريغ أي ضغط داخل الموتور بسبب حركه البساتم و ده بيكون مكانه في اعلي الموتور في غطاء التكاهات

 

نيجي بقي لمرحله الدمار الشامل ..

 لو الزيت بينقص و اتأكدنا من كل اللي فات و مفيش أي تسريبات

في الحاله دي بقي نقدر نقول عيب داخلي جوه الموتور زي كاوتش صبابات بيهرب زيت داخل غرف الحريق يعني من اعلي لاسفل

او للاسف شنابر الزيت بدأت تسرب زيت لغرف الحريق يعني من اسفل لاعلي

و في الحالتين للاسف بتحتاج توضيب للموتور او نقدر نقول كده نصف عمره زي ما بنسميها في السوق

و علشان تعرف العيب من كاوتش الصبابات ولا الشنابر .. لاحظ و انت بتدور العربية الصبح لو لقيت دخان ابيض بيظهر في اول الدوارة من الشكمان لمدة ثواني او نصف دقيقه بالكتير و بعد كده بيختفي يبقي السبب كاوتش صبابات

اما لو لاحظت دخان ابيض مستمر معاك و بيزيد مع الدوسة يبقي انت كده في مرحله الوحش و العيب من الشنابر و هتضطر تتطمن علي الزيت كل فتره قليله كده يعني ممكن كل يوم او يومين لحد ما تقدر تعمل الصيانه اللازمة اللي هي نصف عمرة

و ربنا يبعد عننا كلنا مشاكل نقص الزيت و تسريب الزيت لانها للاسف هي و حرارة الموتور اكتر مشكلتين بيجننوا أي مالك عربية

و كفايه رغي كده النهارده و نكمل في مقالة تانية بقي